ICIP-ICIP KASUSASTRAN JAWA (6)

BAB 15

D A S A N A M A

        

Tembung dasanama asale saka tembung dasa lan nama. Dasa tegese sapuluh, dene nama tegese jeneng utawa aran. Dadi, kang diarani dasanama miturut pangreten kasebut yaiku sawijining tembung kang nduweni jeneng utawa aran liya cacah sapuluh. Nanging apa iya bener mangkono? Pranyata ora! Jalaran, sanadyan tembung mau nduweni jeneng utawa aran liya kang cacahe luwih utawa kurang saka sapuluh, arane iya tetep dasanama.

Hla, banjur apa ta kang diarani dasanama kang sakira luwih mathis? Kang diarani dasanama yaiku tembung-tembung kang nduweni teges kang padha utawa kang dianggep ndhuweni teges kang padha antarane tembung siji lan sijine. Tembung “pandhita” upamane, tembung mau dianggep nduweni teges kang padha karo tembung: dwija, dwijawara, suyati, resi, wasistha, lan ajar.

Miturut Serat Dasanama Jarwa anggitane Raden Tumenggung Sastranagara, iya R.Ng. Yasadipura II nalika isih apangkat kliwon, tembung-tembung mau ditegesi mangkene:

-> pandhita, tegesipun pepundhen, dene pinundhi-pundhi

sarerehan wewengkonipun;

->  dwija, tegesipun angesthi terus lair batos;

-> dwijawara, tegesipun  muruk seja  kalih prakawis,

sapisan: angastuti dewa, kaping kalih: amrih karahayon;

->   suyati, tegesipun amesu cipta, wijangipun: suya = amesu,

ti =  cipta;

-> resi, tegesipun suci, dene anetepi panggalih asuci;

-> wasistha, tegesipun  langkung  awas, kados  ta: sumerep

saderengipun winarah; dene

 -> ajar, tegesipun wajib memulang.

Sarehning tembung-tembung mau dianggep nduweni teges kang padha, mula tembung-tembung mau iya banjur diarani dasanamane tembung “pandhita”.

Tumrap sapa bae kang duwe sedya nggilut kasusastran Jawa, sugih kawruh dasanama iku pawitan utama. Tanpa sugih kawruh dasanama, bakal kacipuhan yen ta gawe reriptan kang sinawung ing tembang.

Ing ngisor iki dasanamane tembung-tembung sawatara kang sinawung ing tembang Asmaradana. Amrih pilah-pilahing tembung kang diandharake dasanamane bisa disumurupi, wiwitaning tembung mau katulis nganggo aksara gedhe. Kanggo njumbuhake guru wilangane apadene guru lagu, ing kene ana sawatara tembung kang ora kapetung dasanama, yaiku tembung-tembung kang ana ing sajroning kurung.

Asmaradana

1.     RATU nata narapati

naranata naradipa

katong pamasa pamase

narpa narpati narendra

naradipati raja

nareswara aji dhatu

NOM taruna timur mudha.

2.    AKU kula amba mami

ulun ingsun ingong ingwang

kawula manira (dene)

KOWE sira panjenengan

jengandika sampeyan

pakenira dika (lamun)

KANCA kanthi rewang rowang.

3.    IBU biyung rena wibi

BAPA rama (tuwin) yayah

sudarma (uga tunggale)

IRENG cemeng langking kresna

GUNUNG wukir ancala

arga giri ardi meru

redi prawata aldaka.

4.    KEMBANG padma puspa sari

puspita kusuma sekar

KETHEK kapi palwaga wre

wanara kenyung rewanda

ORA boten tan datan

LANANG jaler priya jalu

ABANG abrit jingga rekta.

5.    KUNING jenar punar jening

dinar jene pita blengah

PUTIH pethak seta pinge

UDAN jawah riris warsa

KANDHA sabda wicara

wacana ling ujar wuwus

MACAN harimong sardula.

6.    OBONG tunu wlagar basmi

REMBULAN (ya) sasadhara

sasi wulan sitengsu lek

sitaresmi candra badra

YEN yan bilih manawa

manawi lamun kalamun

ASOR nistha dama papa.

7.     SRENGENGE pratanggapati

bagaspati bagaskara

pratanggakara radite

raditya radiktya surya

diwangkara baskara

rawi aruna (tan kantun)

diwasasri (lawan) arka.

8.     DHUWIT arta yatra picis

IWAK ulam mina matswa

AGENG agung gora gedhe

BUTA yaksa yaksi ditya

wil danawa danuja

raseksa raseksi diyu

asura (klebu) kalana.

9.     LEMAH bantala pratiwi

bumi kisma basundara

basundari pratala (yen)

PINTER wasis lebda limpad

wignya guna widagda

widura nimpuna putus

KALI bengawan narmada.

10.  ANAK putra sunu siwi

atmaja tanaya suta

GENDERA panji (myang) rontek

umbul-umbul dwaja dludag

ARAN asma peparab

jeneng kekasih jejuluk

wewangi (lan) panengeran.

11.   PANAH warastra jemparing

astra bana (miwah) sara

TURU nendra guling sare

BANGKE kuwanda kunarpa

KARATON dhatulaya

puri kadhatwan kadhatun

pura kadhaton kadhatyan.

12.  BODHO kumprung punggung pingging

pengung jugul mudha dama

MALIH maning muwah maneh

METENG mbobot ngandhut wawrat

GODHONG ron dhaon patra

SLAMET raharja rahayu

basuki yuwana swasta.

13.  ATI nala kalbu galih

prana driya wardaya tyas

CANTRIK[1]) uluguntung cekel

geluntung manguyu janggan

wasi puthut (manawa)

ENDHANG bidhang (malihipun)

mayang mentrik dungik sontrang.

14.    BANYU toya jala warih

ranu sindu jahning tirta

udaka we lodaka her

ANGIN samirana barat

sindhung bajra pawana

pancaroba lesus bayu

maruta (uga) prahara.

15.    MALING (padha karo) curi

weri pandung duratmaka

TUNJUNG pakaja terate

kumuda saroparuka

saroja sarasidya

KERIS suduk dhuwung dhuhung

katga curiga wangkingan.

16.    DHAUP (iku) ijab kawin

palakrami palakrama

JURANG trebis trejung rejeng

SOROT sunar cahya praba

sirat sunu ujwala

WENGI bengi ratri dalu

TATU kanin labet brana.

17.  GERAH rapuh roga agring

wikara (tegese) lara

ENGGAL aglis agya age

gya tumulya nulya tandya

tandwa gupuh saksana

TUWA sepuh wredha jimbun

MOKAL nglengkara ndupara.

18.   KAYA kados kadya kadi

anglir yayah lir (lan) pendah

lir-pendah pindha (jangkepe)

LANGIT wiyati awiyat

jumantara akasa

antariksa gegana (trus)

widik-widik wiyat tawang.

19.   MATI lampus lena lalis

layon ngemasi pralaya

laya layu (apadene)

palastra padhem antaka

WONG janma jalma tiyang

manusya manusa manus

manuswa manungsa jana.

20.  KABEH sadaya sakalir

sadarum samanta sanggya

sagung salir salwir sakeh

sakweh (atanapi) kapwa

SUMAPUT (ya) kantaka

kapidhara klenger kantu

CELENG waraha sukara.

21.  JARAN kapal aswa wajik

titihan turangga kuda

MAS kancana rukmi jene

rukma kanaka suwarna

GAJAH liman matangga

asti esthi brajamuthu

dirada (tuwin) dwipangga.

22. KALAH katitih kelindhih

kawon kasor kandhah kandhap

ULA sarpa naga (lyane)

bujangga ardawalika

NDELENG ndelok ngeksi (myang)

miyat anon mulat ndulu

NAPAS uswasa usyasa.

23. WETU wiyos wedal wijil

wuryan wahya (sarta) wimba

BEN kareben murih dimen

amrih supados supaya

AWAN siyang raina

RAME atri umyang umyung

gumuruh ramya gurnita.

24. DUKA muntab kridha muring

bendu nepsu (karo) mangkrak

UTUSAN caraka gandhek

duta cundhaka prajaka

KONDHANG kasub kawentar

kombul kaloka misuwur

kongas kasusra sumbaga.

25. WEDHUS menda domba kambing

THATHIT kilat lidhah kedhap

kelap widyuta caleret

LEMBU andini andaka

sapi pirdos andana

ENDAH respati raras-rum

asri peni alep listya.  (Mul).

Katrangan:

Ing basa Jawa, sawijining tembung bisa nduweni teges luwih saka siji. Mula iya ora aneh yen ing tembang Asmaradana kasebut ana sawijining tembung kang dienggo dasanamane tembung kang beda.

-------------------------@-------------------------

 BAB 16

S A N E P A

Sadurunge ngrembug bab apa ta kang diarani sanepa kuwi, ing ngisor iki dipethikake dongeng mula bukane trenggiling yen ana bebaya banjur ngringkel. Dongeng mau kapethik saka buku Njamikan (kawaosa: Nyamikan) jilid 1, buku wacane murid-murid pamulangan andhap (yen saiki padha karo: Sekolah Dasar) jaman biyen, anggitane M. Mardjana lan M. Samoed Sastrowardojo.

Gambuh

1. Trenggiling mlayu-mlayu

kepapag lan mitrane satuhu

iya iku si luwing ana ing tegil

luwing sajak rada gumun

nulya sigra dennya takon

2. “Yagene iku mau

 ambekanmu teka ngangsur-angsur

 karenggosan kaya dioyak ing janmi”

Sigra trenggiling sumaur

“Mau kapregok ing uwong”.

3. Luwing calathu ngguguk

sajak ngece marang kancanipun

“Kebangeten kowe kuwi heh trenggiling

weruh uwong bae gugup

playumu alonjong botor”.

4. Trenggiling rada nepsu

nanging sareh amangsuli wuwus

“Lah kok aneh kowe kuwi heh si luwing

aku kokpenging lumayu

kalamun kepapag nguwong.

5. Lah kepriye polahku

yen cinekel tan wurung ingingu

kinurungan tan mardika rina wengi

nadyan pangan ngombe cukup

datan bisa kloyang-kloyong.

6. Apa seneng atiku

anak bojo datan bisa weruh?”

Mitrane si luwing anyauri aris

“Gampang bae pratikelku

kalamun ginepok ing wong.

7. Awakku nuli mlengkung

amalungker andhelik sirahku

datan kongsi bisa kecandhak ing janmi

kinira aku wis lampus

satemah binuwang adoh”.

8. Trenggiling amituhu

mring welinge mitranira mau

mula saben-saben kepapag ing janmi

ora ngoncati pakewuh

malah ngringkel api layon.

Ing pada kaping telu gatra pungkasan ana unen-unen, “playumu alonjong botor”. Tembung “lonjong” (ater-ater a- ing wacan kasebut mung kanggo nggenepi guru wilangan bae), manut jinising tembung kalebu tembung watak utawa kaanan, dene tembung “botor” kalebu tembung aran. Botor iku kalebu barang kang bunder. Ewa samono diarani lonjong. Iki mratandhani playune trenggiling banter banget. Saking bantere, nganti trenggiling kang awake dawa iku katon bunder. Botor kang bunder bae isih kungkulan bundere. Awit saka iku botor mau diarani lonjong, marga kungkulan bunder dening kaanane trenggiling nalika mlayu.

Iya unen-unen kang tegese mbangetake, kadadean saka tembung kaanan lan tembung aran nanging kosok-balen iku  kang  diarani sanepa. Kang disanepakake (ing tuladha kasebut: playune trenggiling) kaanane ngungkuli utawa ngluwihi kaanane barang kang kasebut ing wekasane ukara sanepa (ing tuladha kasebut: botor). Utawa, botor kang sajatine bunder iku dianggep kosok baline, yaiku lonjong, yen katandhing karo bundering kaanane trenggiling nalika mlayu.

Sanepa, panganggone tarkadhang uga ana kang disaroja. Upamane, sanepa “renggang gula” kang padha karo sanepa “kumepyur pulut”, kanggo mbangetake surasa, sanepa loro mau banjur dienggo bebarengan dadi ”renggang gula, kumepyur pulut”. Sanepa “renggang gula”  iku sanepane wong kang raket sesrawungane. Samono uga sanepa “kumepyur pulut”. Janturan kirab kanarendran ing upacara pawiwahan ngisor iki bisa dienggo tuladha.

................................................................................................

Kebayak landhung langking warnane ugi tan kari sinulam  ing benang rukma, kaistha  sekar tunjung seta,  tuhu  endah tuhu edi, mila  panganten  putri datan siwah sekaring kedhaton. Sangsangan mas sinangling carub wor sangsangan sekar mlathi ginubah, kumlawer maripit ing jaja lir naga taksaka marepeg angalon lampah. Sida asih nyampinge, kembar kalawan nyampinge panganten kakung. Kang mangkono asung pralambang manawa panganten kakung lan putri kembar tresnane, kembar bibit, bebet, lan bobote. Raket supeket akekanthen asta, tan ginggang sarikma, yen ta densanepakake: renggang gula kumepyur pulut.

................................................................................................

(Upacara Panganten (Tatacara Kajawen), dhapukane R. Danang Sutawijaya lan R.M.A. Sudi Yatmana, kaowahan sawatara)

Gula, ing kene karepe: gula Jawa, kang kacithak ing bumbung utawa cithakan liyane, iku ora ana renggange. Ewa samono isih diarani renggang yen ta katandhing karo astane panganten sakaloron kang tansah akekanthen iku. Samono uga pulut. Ora ana pulut kang kumepyur, awit pulut iku pliket. Kang kumepyur iku barang kang ora pliket. Ewa samono puluh isih diarani kumepyur yen ta katandhing karo puleting astane panganten sakaliyan kang ora gelem ginggang sarambut iku, kaya-kaya astane panganten kakung lan putri iku ana pulute saengga kelet. Kanthi tembung liya: gula kang sajatine rapet iku dianggep kosok baline, yaiku renggang, yen katandhing karo rapeting astane panganten kakung lan putri kang lagi gegandhengan iku. Samono uga pulut kang sajatine pliket iku dianggep kosok baline, yaiku kumepyur, yen katandhing karo astane panganten sakaliyan kang kaya-kaya ora bisa dipisahake marga saking plikete.

Unen-unen liyane kang kalebu sanepa, kaya ta:

1.      Abang dluwang          -> cahyane

2.     Abot kapuk              -> bobote

3.     Agal glepung             -> wujude

4.     Anteng kitiran          -> polahe (rongeh banget)

5.     Arang wulu kucing     -> kehing utange

6.     Arang kranjang         -> tatune

7.     Arum jamban            -> gandane

8.     Atos debog               -> balunge (ora duwe kasekten)

9.     Bening leri                -> cahyane

10.  Benjo tampah            -> wujude

11.   Dhuwur kencur         -> dedege

12.  Jero tapak meri       -> kawruhe

13.  Lonjong mimis           -> playune

14.  Legi bratawali          -> rasane

15.  Pait madu                 -> eseme, swarane, omongane

16.  Pait kilang                -> eseme, swarane, omongane

17.  Pered beton              -> rembuge

18.  Resik paceren           -> tembunge (olehe ngunen-uneni)

19.  Sigar semangka         -> pamore.

-------------------------@-------------------------

Ana candhake:
http://mulyonoatmosiswartoputra.blogspot.com/2013/12/icip-icip-kasusastran-jawa-7.html

---

[1])  Cantrik iku reh pandhita lanang. Yen reh pandhita wadon jenenge endhang.