Gabah ditutu dadi beras
menire kanggo pakan ayam
Dhuwit digawe saka kertas
ana uga kang saka logam
Lombok cilik jenenge rawit
digeget gawe mbrabak abang
Kepengin mangan butuh dhuwit
mangkono uga pengin nyandhang
Swara entut muni makthuwit
sing kambonan trus kepet-kepet
Kabeh-kabeh mbutuhke dhuwit
ra duwe dhuwit sirah mumet
Sembadra bojone Permadi
marune peparab Srikandhi
Dhuwit ora digawa mati
ra duwe dhuwit kaya mati
Nyangking ember nggawa kumbahan
umbah-umbah neng Kali Kemit
Nadyan dhuwit dudu sembahan
ana wong kang mangeran dhuwit
Sirah plonthos arane gundhul
mangane akeh jare dremba
Direwangi ngopeni thuyul
dimen sugih tanpa makarya
Bantal empuk kapuke randhu
dienggo turu krasa penak
Kang mangkono aja ditiru
ora becik dunya akhirat.
(Jika kali ini saya menulis parikan [atau pantun dalam bahasa Indonesia], ini untuk mengenang masa lalu di mana dulu saya pernah menulis dalam bahasa Jawa di majalah-majalah berbahasa Jawa).
